کھوار، اردو لغت وا ناجی خان ناجی
فرید احمد رضا
لغت نویسی لسانیتو علمو ای شعبہ شیر کی ہے علمہ ای وارو ذخیرہ الفاظان جمع کوری خاص طریقہ ترتیب دیتی کتابی شکل دیونو بوئے ہتوتین ڈکشنری یا لغت ریر۔ لغت مرتب کوریک صرف الفاظان جمع کوریک نو۔ ہیس ہیغار کافی لوٹ کوروم ۔ لغتہ الفاظان جمع کوریکو سوم جوستہ ہے الفاظان بارا واضح معلومات دیونو بوئے کیچہ کی اجزائے کلام،مترادف الفاظ، متضاد الفاظ، الفاظان تاریخ، خور وارا الفاظان ترجمہ ، ضرب المثال وا محاورہ ۔ صرف الفاظ جمع کوری ہتو ترجمہ نویشکو تین ورڈ لسٹ ریر ڈکشنری نو۔ ڈکشنریہ ای لفطو بارا ہوݰ کوریکو بچین تفصیل دیونو بوئے۔ہیہ وجہ شیر کی لغت نویسیو ای گیران کوروم جوݰونو بویان۔
لغت نویسیو بچین لسانیتو علمو بارا دی بنیادی معلومات بیک ضروری شیر ۔ ہے موژی ہوازان بارا علم، ،سینٹکس،سیلبل پیٹرن واہے سوم جوستہ متعلقہ زبانو ساختیتاتو علمو ہوݰ کوریک لغت ساؤزیاکو بچین لازمی شیر۔ کوریکو کی ای وارو کنسوننٹ وا ویل ہوازاری واقفیت گرائمرو وا وارو اندرینی الفاظان ترتیب اوچے ترکیبو بارا پتہ بیک لغت سازیو بچین بنیادی شرط شیر۔ ہیغین دیتی لغت نویسی ادبو نو بلکہ زبانو خدمت جوݰونو بویان۔
ای لغت نویسو بچین سفوسار مشکل کوروم ہیہ کی لغت نویسی ای وقت طلب اشناری۔ لغت ساؤزیک ای مسو یا ای سالو کوروم نو۔ لغت ساؤزیکو کورمو بچین کندوری سال درکار بونیان۔ ماہرینان رائے شیر کی ای انوسو جو لفظ یا تروئے لفظو مکمل تفصیلو سورا ڈکشنریا نیویشن بوئے ہغیار زیاد نو۔ ہیہ حسابہ سالا ݮھوئے شورار پھوک ذیاد الفاظ جمع بونی۔ اگر ہمی الفاظان سالو سوم کی ضرب دین ہوئے تھے جوش ݯھوئے ہزارو الفاظان بچین کندوری وخت لیگوران ہو اندازہ کوریک مشکل نو،وا ہیہ اندازو کوریک دی مشکل نو کی استاذناجی صاحب مرحوم ہیہ لغنتو ساوزیکو بچین کندوری مشقت بیرو بوئے ۔
کھوارو تاریخہ ہمونیہ پت تروئے لغت اسپہ پروشٹہ گیتی شینی۔ (اولانو لغت کھوار اوچے انگریزی وارا ترجمو سوم جوستہ اسماعیل سلون ۸ نومبر ۲۰۰۶ محدود الفاظان سورا ترتیب دیتی شائع کوری اسور۔ ہیہ ڈکشنری نیٹہ موجود شیر،ایمے زونا بیزیمیکو بچین دی دستیاب شیر ۔محترم علینہ بشیر صاحبو ڈیجیٹل لغت کی ہوسوم ہواز دی شامل شیر۔ہیہ لغت دی ان لائن پبلش بیتی شیر۔ ہمی کھاڑلغتتہ الفاظان تعداد محدود شینی۔
ہنوناری تقریبا جوش پونج سال پروشٹی کیہ وت کی استاذ ناجی خان ناجی صاحب لغتو سورا کوروم کویان رے مت پتہ ہوئے مہ ہتوسوم ملاقاتو شوق پیدا ہوئے وا ۸ اگست ۲۰۰۸ انوسو شتخارا بی استاذو دولت خانہ بی ہتو سوم ملاقات اریتام۔مہ ملاقات کوریکو ای وجہ ہیہ دی اوشوئے کی اوا لغت نویسیو بارا ٹریننگ دی کوری اسوم وا لغتو سورا پھوک کوروم مہ دی شیر۔
استاذو سوم ملاقات کوری لغت سازیو بارا مشقول ہوتام۔ ہتے وختہ استاذو لغت تیار بیتی پرنٹوتین بی اوشوئے ۔ہے مشقولگیو موژی استاذ متین لو پرائے کی ہیس کافی پروشٹی تان شوقو بچین الفاظان جمع کوراوا بیرائے، مگم باقاعدہ ہ میہ بیتی لغتو سورا کوروم ۲۰۰۰ ء شروع کاردو بیرائے وا ہیہ لغت ۲۰۰۸ تیار ہوئے۔ ہیہ لغتہ تقریباً پھوک کیاغ کم جوش ݯھوئے ہزار الفاظ جمع شینی۔ ہیہ مشقولگیو موژی متین پتہ ہوئے کی استاذ محترم لغت نویسیو بارا بو جم ہوݰ کویان وا ہیس لسانیتو بنیاد ی علمو بار جما خبردار اسور۔
ہے مشقولگیو موژی ناجی صاحب تان متین لو پرائے کی ہو ہیہ لغت اردو”فیروزلغات ” پروشٹہ لکھی یعنی ہو فارمیٹہ ترتیب دیونو بیتی شیر ۔ ہیہ کھوار لغتو کورمو موژی مشکل بیکو صورتہ کندوری خور لوٹھورانان سوم دی ملاقات کوراؤ ہتیتان سار مدد دی گانیرو بیرائے۔ ہیہ قسمہ کھوارو اولانو ہیہ جامع لغت چھپائیو مرحلہ توریررو بیرائے۔
یہ بھی پڑھیے: ناجی خان ناجی، ایک لغت نویس کی رحلت
کھوار اردو لغتو ای کمہ خوبی ہمیت شینی
کھوار اردو لغت ۱۶۰۰۰ الفاظان سورا مشتمل ای جامع لغت شیر۔
کھوار ڈکشنری بائی لینگویل لغت شیر ہیہ جو وار کھوار وا اردو شامل شینی ۔
ہیہ لغتہ الفاظان ایتمالوجیو بارامعلومات دیونو بیتی شیر۔ کیہ الفاظ کیہ وارار کی ادھار بیتی گیتی شینی ہتیتان بارا دی معلومات دیتی شیر۔
ہیہ لغتو ای خور خوبی ہموُݰ شیر کی ہیارا ڈائیلکٹو خیالو لکھونو بیتی شیر۔ اگرچہ ناجی استاذ تان رے اسور کی الفاظ جمع کوریکو بچین تورکھوو علاقہ محنت کورونو بیتی شیر مگم وا دی کیہ الفاظ خور ژاغہ کی خور قسمہ ہجہ یا پروناونس بونیان ہتو تین دی ہیہ ڈکشنریہ ژاغا دیونو بیتی شیر۔
ہر لفظو پروشٹہ ہے لفظو کیٹگری دیتی شیر ایا ہیہ لفظ اسم شیر، ورب شیر ایڈورب یا اسم صفت ۔
کھوارو ہیہ لغتہ الفاظان ریفرنس دی دیونو بیتی شیر۔ ای لفظ ای ژاغہ انٹری بیتی شیر وا خور ژاغہ ہے لفظو سوم متعلقہ لفظ گیکو صورتہ ہیہ لفظو دی رنفرینسو دیتی شیر۔
ہیڈورڈ یا مین انٹریو سوم جوستہ ای لفطو سب انٹری دی دیونو بیتی شیر تاکہ کیہ دی قسمہ ای لفظو ہوݰ کوریکا آسانی بوئے وا کیہ دی قسمہ ای لفظو آسانیو سورا لین بوئے
ای لفظ مین انٹریو سوم جوستہ سب انٹری شامل شیراچی ہے لفظو ہیڈ انٹریہ دی شامل کورونو بیتی شیر کی ہیس ای معیاری لغتو لازمی جز جوشونو بویان۔ تاکہ الفاظو لغتہ مݰکاوا مشکل نوبوئے۔
کیہ مشکل الفاطو ذہین نشین کوریکو بچین ہتو جملہ استعمال دی کورونو بیتی شیر ۔تاکہ ای لفظو معنیو ہوݰ کوریکا آسانی بوئے۔
پروناؤسیشن یا تلفظو صحی کوریکو بچین ہر ای لفظو پروشٹہ آسان طریقہ ہجہ کوریکو طریقو دی دیونو بیتی شیر۔
انفلیکٹیت فارم: سفوسار اہم لو ہیہ شیر کی ہیہ ڈکشنریہ کیہ لفظ کی انفلکٹ بییتی لفظ ساؤزبونیان ہتے بارا دی معلومات دیونو بیتی شیر۔
کیہ وت کی اسپہ کھوار اردو لغتو ہمی صفتان لاڑیسان تھے اسپت پتہ بویان محترم ناجی استاذ مرحوم صرف ادبی شخصیت تان نو بلکہ لغت نویسیو علمو وا لسنایتو بنیادی اصولان ساری دی جم واقف اوشوئے۔ کیہ کیٹگریان ناجی صاحب تان کھوار، اردو لغتہ کی جمع کوری اسور ہیت سف لسانیتو علماری واقف بیکار غیر ممکن نو۔کھوار زبانو بچین ہیہ ای لوٹ خدمت شیر۔ جب تک کھوار وا کھو قوم زندہ اسور ناجی استاذو نام ہمیشہ زندہ بہچور وناجی استاذ مرحومو کھوارو محسن حیثتیہ یاد لاکھونو بوئے
(جوش ای نومبر ناجی خان ناجیو مرحومو یادا پروگرامو بچین نویشرو مقالہ)
Posted on 25 November 2023
