مستوجو نوغورا 1928 عیسویہ پھتاک

1928 عیسویہ مستوجو گورنر اسیکہ مستوجو نوغورہ کیہ پھتاک دیک کی پوشیتام  ہسے ہموش اوشوئے؛

ای زارو اختی اسَقال نوغورو قدیمی بائے پشو اِستانتو نیسی کوماڑہ گیتی مشقری دیتی ریکا پرائے اوا شوم سالو رخصت اریتام ،جم سالو گانی ہاتم۔ژیژاوانتے بوک وا ژور گینیان  موش گانی گیتی اسوم ۔ہیہ سال بو جم بوئے۔ میوہ بیجار لاؤ کونی۔ ۻھیر زیات بوئے۔خوشانی امبوخ بونی۔ غم نو تان بوئے۔

ہیرار اچی دُوری گیتی پارہ پیثیرو کوری ٹھون ٹھونہ پھتاک پرائے۔ سنجیر اوچے پتاریہ پتھاک پرائے۔ وا کھائے پیشیرین تونیشو نقشو اریر۔ ہموغار اچی اسقال دیہو ویڥکی بغائے۔ وا دیہی بی ہر دُورا ہموش زائیلہ پھتاک دیتی ہر دُورار غان غانہ شوشپ گنی اچی گیکو دیہو روئے سف گیتی نیشی مہراکہ کوری ڥوڥپان اویوتام۔

مگم موڑکھوئی پھتاک دیک خور بیرائے۔ میتارانان وختہ موڑکھوؤ نغورو شرانہ پھتاکو چھوچی درست دیہو روئے ہیم پڑاڅو گانی جمع باک بیرانی ۔ وا ہیم پڑاڅو دیک شروع باک بیرائے۔ نوغوری اسیرو ہیم پڑاڅو گانی  بیریو ہتیتانے خامیاک بیرانی ۔ بیریاری اندرینی کوری خامیییاک بیرانی۔ ہیہ ہیم پڑاڅو ژانگہ بیریو  ہیت کی نوغورو رویانتے باڑے نوغوری اوتیتانی گورنرو  سار چشٹ ژیبونی۔ اگر کی نوغورو روئے  زور لاکھی دیہو رویان داڑیتانی تھے دیہو رویان سورو چشٹ غیراک بیرائے۔

(بحوالہ: جمہور اسلام کھوار، شمارہ ستمبر 1977)

بشکریہ مئیر چترال