مرحوم خالدؔ اوچے ہردی پھت ہردی
تحریر: حمید الرحمان حقی
صورتہ فقط گوڑی بوتیکو بݰ. نیچو ہاݰ جوان کی شیروتے موخ کوریکو بݰ، تعلیم پورا، کوماڑین تیل لاچھوران فقط ہاݰ دور. اخرہ جم نیویری نامی استور ہون دیتی مدام دل تیار، موٹور موڑا، آہیی بغاے آف بعاے کا بشار گاناک نکی۔ نہی ناگون ملگیریان اسونی کیہ عقول حیران بیکو بݰ، بالا آپسار وا کیہ غم دیگار نکی، ژیبئک پئیک نشیک ریپھیک ہیچ کھیو کیہ کمی نو، ڑاے بوئیکو ݯھیر دی ریکو لیران، دنیو خاسو خمو خوشانی کھیو دی کمی نکی، جامار جم، بتھارار بتھار رویو دی تان ڈالہ گانیکو لوٹار لوٹ څیقار څیق کورمو کوری، کوس خوشان یا خفا کوریکو طاقت شیر، کوس دھکارہ گیکو ،بیرو اویجا سفانتے خذمت کوریکو بݰ طاقت شیر، ژانیرو پوشیرو، یار دوستان سف تعو کھامیابیو پوشی تیلیلی۔ روئے تغو زندگیوتے آرمان اوچے آرمان کونیان، کھامیابی اوچے زندگیوتے وا تعو مقصدی توریکوتے لوڑی آپاکی اوغ گیکو بݰ۔روے تعو زندگیوتے تعو نصیب اوچے قسمتوتے آرمان کونیان ہاݰ انسان۔
لیکن ہتے انسانو نیزدا ہے ہانی کھامیابی کھیو کی خور روے کھامیابی جاݰونیان، کھیوکی خور روے خوشانی جاݰونیان، کھیوتے کی خور روے آرمان کونیان، کھیو پوشی کی خور رویان آپاکی اوغ گویان.. سف ہیچ، سف بے مقصد، سف مدارا۔ کوریکو کی ہے انسان مال ودولت نو، بلکہ محبتو دَمدار،کوریکو کی ہے انسان دنیو نو، پیار محبتو عاشق۔ ہاݰ انسانو دنیا بظاہر کھیو کمی نکی مگم شب فرقت اوچے شب ہجرانار غیر خور کیاغ شیر تان نو،اگرچہ زندگیا درہم ودینار شینی مگم وصل یارو ارمانہ اسیکین اسور، وا فراق یارا برق پھت وا بوژین بیتی تان حالت زارو بیان کوراو خدایو سار گلہ مند بیتی ہموݰ ریکا مجبور…
تقسیم ہوتام یکسو کوری ای ݯت لوڑے کی مہ
اے عرشِ نشین یو کوری ای ݯت لوڑے کی مہ.
وا دینو سف مال و دولت، عزت و وقار سف بیکو باوجودا تان سورا باک ظلم وستھم وا بے وفائی اوچے سختیان ذکرو کوری ہموݰ ریکا مجبور۔
تہ غم مہ ہݰ کورویان اے غم دل
غمو کھیلوݰ کوریان اے غم دل
بندہ نواز بیراے مہ شاہ حُسن
مہ خااروخس کورویان اے غم دل.
وا ای خور ژاغہ گیتی دنیو رنگینی اوچے شان و شوکت وا تان محبتو ایغو سوم نیمیے ہموݰ ریران.
ای جو گمبوری یا سرور اوچے مس
کیہ برابار بیلی ژانو نسو سوم
تان گلستانہ ہزار سال آساکان
تو برابار موکو مہ ای بسو سوم،
ای خور ژاغا گیتی دنیو ݰییلی اوچے نمائشو عارضی جوݰی وا وفا خلوص اوچے محبتو ای بیش بہا دولت جوݰی ہموݰ ریران
غیژی مہ تان ریکو تہ تان بیرایا
وفا خلوصو کیہ قیمت شیرایا
دولت و عہدہ بیکو باوجودا محبتو ہوستہ شکست بیتی وا دنیو بے ثباتیو اوچے دوستو حسن وجمالو بے اختیار وا بوغاک وا تان بے بسیو زمانو سوم تھمثیل دیتی ہموݰ ران.
بے اختیار بیراتم کھاڑ ہیارہ
زمانو یار بیراتم کھاڑ ہیارہ
نادان ہردی بیرانی کھاڑ جو مݯھہ
ہوساو انگار بیراتم کھاڑ ہیارہ
یہ بے ثباتو بچین کیاغ نو ہوتام
بو دنیا دار بیراتم کھاڑ ہیارہ.
مختصر ہیا کی خالدو پوشیرو انسان یا خالدو شاعری وا ہردی پھت ہردی ریرار پویار ہر انسان یقیناً ہیا لو دی دوے کی، دنیا خوشانیو بچین کھامیابی صرف ظاہری مال و دولت یا شان و شوکت تان نو، بلکہ سفو سار لوٹ دولت پیار محبت وا تان موژی خلوص و ہمدردی احساس و صلہ رحمی بوژیک دی بے کھنار دولت۔ وا ہیا لو دی حقیقت کی محبت، شفقت، رحمی دلی دوستی وا پیار محبت لوٹ موشی، جام روئی رویان ہردیا تانتے ژاغہ سوزے ای غیچی گیونو کامیاب انسان بیتی زندگی تئریک محبت و احساسار غیر بالکل ناممکن. وا کیہ دی انسان ہے خصلتان پھار پیڅھی کامیاب یا غیچی گیونو انسان بیکو نو بوے، وا انسانو خور مخلوقات و ذی روحان سار علحیدہ کوراک واحد اشناری صرف اور صرف محبت، احساس وا پیار و خلوص و وفا بس۔ کیچہ کی خالد ریران
تو جم لوڑے انسانہ نو سہ خور کیہ ذی روح
خالد کیڑاو غمان کی تہ سوم کا بوژیکو ہائے
اللہ پاک مرحوم خالد صاحبو روحوتے ابدی سکون دیار. آمین
